Xəbər mətni
Qürur hissi ilə bildiririk ki, AZEBİ olaraq Gürcüstan-Azərbaycan-Türkiyə Biznes Forumunda iştirak etdik. Üç qardaş ölkənin iş adamlarını və dövlət rəsmilərini bir araya gətirən bu mötəbər tədbir, iş birliyimizin nə qədər dərin və möhkəm olduğunu bir daha nümayiş etdirdi.
Forumda Gürcüstanın Dayanıqlı İnkişaf naziri xanım Mariam Kvrivishvili, Azərbaycan Respublikasının İqtisadiyyat naziri cənab Mikayıl Cabbarov və Türkiyənin Ticarət naziri prof. dr. Ömer Bolat, hər üç ölkənin səfirləri, digər yüksək vəzifəli rəsmilər və çoxsaylı iş adamları iştirak edirdi. Tədbir Gürcüstan Ticarət və Sənaye Palatası, AZPROMO (Azərbaycan Respublikasının İxrac və İnvestisiya Təşviqi Agentliyi) və Türkiyənin Xarici İqtisadi Əlaqələr Şurası (DEİK) tərəfindən təşkil olunmuşdu.
Belə forumlar təkcə ticarət əlaqələrinin genişləndirilməsi üçün platforma yaratmır, eyni zamanda ortaq layihələrin müzakirəsi, yeni investisiya imkanlarının dəyərləndirilməsi və regional inkişafın sürətləndirilməsi baxımından mühüm əhəmiyyət kəsb edir. Biz inanırıq ki, bu cərəyan edən dialoq hər üç ölkənin iqtisadiyyatına, iş adamlarına və ümumən xalqlarımızın rifahına mühüm töhfələr verəcək.
Tədbirin təşkilatçılarına və bütün iştirakçılara təşəkkür edirik. Əminik ki, əldə olunan əlaqələr və müzakirələr qarşılıqlı fayda gətirəcək yeni uğurlu tərəfdaşlıqlara zəmin yaradacaq. Bütün tərəflərə bundan sonrakı işlərində uğurlar arzulayırıq!
Foto Qalereya
